Stúdentakjallararinn á nýjum stað

"Háskólasamfélagið er svo risastórt og ólíkir einstaklingar sem mynda það. Við viljum reyna að þjóna markshópnum með því að hafa eins fjölbreytta dagskrá og við mögulega getum," segir Björg Magnúsdóttir, dagskrárstjóri hins nýopnaða Stúdentakjallara.

Margir kunna að þekkja nafnið enda var sams konar staður undir sama nafni starfræktur í Gamla Garði frá árinu 1975 til 2007. Þegar bygging Háskólatorgs reis árið 2007 var honum lokað en nú hefur Stúdentakjallarinn verið opnaður aftur á nýjum stað, fyrstu hæð téðs Háskólatorgs. "Við höfum verið meðvituð um söguna í hönnun staðarins og reynt að gera henni góð skil, til að mynda með því að hafa gömul Stúdentablöð hangandi á veggjunum," segir Björg.

Innangengt er á barinn frá Háskólatorgi, auk þess sem hægt er að ganga inn á hann beint af götunni. Opið er frá 11 til 23 alla daga nema fimmtudaga og föstudaga, þegar opið er til eitt, og þrátt fyrir að markhópurinn sé háskólanemar er staðurinn opinn öllum.

Innflutningshátíð Stúdentakjallarans hófst í dag og stendur til 31. janúar. Mikil og flott dagskrá verður á hátíðinni og segir Björg hana eiga að endurspegla þá flóru sem verður í dagskránni yfir höfuð. "Við verðum með alls konar grín, dans, kvikmyndir, töfrabrögð, kappræður og mikla tónlist til að nefna dæmi. Það er bara vonandi að þetta mælist vel fyrir og allir fái eitthvað fyrir sinn snúð," segir hún.

Hér er dagskrá innflutningshátíðar staðarins.