Félagi Hannesar reyndi að svindla

Austurríska úrvalsdeildarfélagið SV Grödig hefur þurft að reka tvo leikmenn úr sínum röðum þar sem annar þeirra reyndi að hagræða úrslitum leikja liðsins. Hafnfirðingurinn Hannes Þ. Sigurðsson er á mála hjá félaginu.

Í síðustu viku var Dominique Taboga handtekinn en hann var ásakaður um að hafa reynt að hagnast á veðmálabraski og þar að auki reynt að fá nokkra félaga sína til að aðstoða sig við það.

Taboga var umsvifalaust rekinn frá félaginu en stuttu síðar sögðu forráðamenn Grödig upp samningi annars leikmanns, Thomas Zündel, fyrir meintan trúnaðarbrest.

Taboga mun hafa sent Zündel skilaboð og spurt hann hvort hann vildi taka þátt í „verkefni“ með sér. Zündel neitaði en fór ekki með málið lengra, eins og hann hefði átt að gera að mati forráðamanna Grödig.

Nýliðar Grödig hafa náð frábærum árangri í austurrísku úrvalsdeildinni í vetur og eru nú í fjórða sæti. Liðið tapaði þó fyrir Admira Wacker í fyrrakvöld, 5-3, þar sem þrír leikmenn Grödig fengu að líta rauða spjaldið. Með sigri hefði liðið komist upp í annað sæti deildarinnar.

Hannes var ónotaður varamaður í leiknum en hann hefur einu sinni fengið tækifæri í byrjunarliði félagsins í deildinni í vetur. Hannes hefur skorað eitt mark í þeim sex leikjum þar sem hann hefur komið við sögu.