„Ég reyni að vera almennileg manneskja og liðsmaður“

„Það er lykilatriði að fá ekki á sig mark í heimaleiknum. Á meðan við höldum þeim markalausum þá eigum við góða möguleika,“ segir landsliðsmarkvörðurinn og öldungurinn í íslenska landsliðshópnum, Gunnleifur Gunnleifsson. Hann segir sjálfstraustið í íslenska landsliðshópnum vera gríðarlegt.“

„Við höfum mikla trú á okkur og okkar getu. Við teljum okkur geta gert hvað sem er gegn hverjum sem er. Það er enginn hroki að segja það. Við höfum mikla trú á okkur og höfum sýnt hvað við getum. Svo hafa menn mikinn metnað fyrir landsliðinu. Það er engin ástæða til annars en að vera kokhraustur.“

Gunnleifur hefur þurft að verma tréverkið þar sem Hannes Þór Halldórsson heldur stöðu aðalmarkvarðar. Gunnleifur tekur hlutverk sitt í hópnum alvarlega og leggur sitt af mörkum þó svo hann sé ekki að spila.

„Ég reyni að vera almennileg manneskja og liðsmaður. Ég hjálpa hópnum til þess að ná árangri. Auðvitað vil ég spila en það spilar bara einn markvörður í einu. Það er Hannes í dag og hann er að spila frábærlega. Það kemur því í minn hlut að styðja við hann og ég geri það eins vel og ég get. Við værum ekkert að ná þessum árangri nema allir stæðu saman. Alveg sama hvar þeir eru í goggunarröðinni.“

Kópavogsbúinn segir að hópurinn hjá íslenska liðinu sé sérstakur og samheldnin mikil. Það sé einn hluti þess að liðið sé að ná þessum flotta árangri.

„Það er algjört lykilatriði. Það hefði ekki gengið svona vel ef hópurinn væri ekki þetta góður og í svona miklu jafnvægi. Það styðja allir hver annan. Við breytum því ekkert út af vananum í undirbúningnum. Við erum ekkert of spenntir né of slakir. Þó svo umfangið sé meira í kringum þennan leik þá höldum við okkar striki.“

Erum með gæðamenn

Það verður væntanlega nóg að gera hjá bakverðinum Ara Frey Skúlasyni við að halda aftur af sprækum sóknarmönnum Króata.

„Ég verð að vera á tánum í 95 mínútur og vera tilbúinn, líkamlega sem andlega. Þetta verður svipað erfitt og gegn Sviss,“ sagði Ari Freyr ákveðinn fyrir æfingu íslenska liðsins í Kórnum í gær.

„Þeir eru með frábæra kantmenn. Virkilega góða fótboltamenn. Enginn rosalega fljótur en allir góðir í fótbolta. Það verður að halda einbeitingu allan tímann. Vera í bakinu á þeim og gefa ekkert eftir,“ bætir Ari við en hann er kokhraustur.

„Við erum með gæðaleikmenn sem geta skorað hvenær sem er. Við þurfum ekki að bera virðingu fyrir þeim. Þeir ættu frekar að bera virðingu fyrir okkur þar sem við komumst í þessa stöðu.“