Jóhann Berg þarf engan Range Rover

„Það er ákveðin gryfja sem myndast í Kaplakrika. Völlurinn er mjög lágur og ekki þessi hlaupabraut eins og í Laugardalnum,“ segir Jóhann Berg Guðmundsson, landsliðsmaður Íslands.

Jóhann Berg var í viðtali í útvarpsþættinum Harmageddon á X-inu 977 í gær. Þar var Jóhann spurður hvort ekki væri hægt að mynda betri stemmningu í Kaplakrika, líkt og þegar 21 árs landsliðið spilaði þar, heldur en í Laugardalnum.

Kantmaðurinn úr Kópavogi benti á að ef byggðar yrðu stúkur við enda vallarins úr Kaplakrika væri kominn alvöru leikvangur í Hafnarfirði. Hins vegar væri Laugardalsvöllur heimavöllur landsliðsins og það þyrfti að gera eins vel og hægt er úr því.

Harmageddon-bræður, Þeir Frosti Logason og Máni Pétursson, gengu á Jóhann Berg sem spilar sem atvinnumaður með AZ Alkmaar í Hollandi. Spurðu þeir kappann hvort hann lifði eins og rokkstjarna ytra.

„Ekki alveg eins og rokkstjarna en þetta er mjög gott líf. Maður æfir einu sinni á dag og hefur svo allan daginn til að kíkja í golf eða slaka á og horfa á sjónvarpið. Þetta er ekki stressandi,“ sagði Jóhann Berg.

Landsliðsmaðurinn er liðsfélagi Arons Jóhannssonar hjá AZ. Aron valdi sem kunnugt er að spila með bandaríska landsliðinu á dögunum frekar en því íslenska.

„Maður skýtur stundum á hann en ekkert alvarlegt. Maður er ekkert að fara að hengja hann fyrir að hafa valið þetta. Þetta er hans ákvörðun,“ sagði Aron. Hann grínaðist með að Aron þyrfti að sætta sig við að hanga með íslensku fótboltastrákunum í Hollandi enda ekki margir Bandaríkjamenn á svæðinu.

Aftur var umræðunni snúið að lífsstíl Jóhanns í Hollandi. Rifjuðu þeir Frosti og Máni upp þegar tveir landsliðsmenn mættu í viðtal til þeirra, hvor á sínum Range Rover jeppanum.

„Nei, ég er ekki á Range Rover jeppa,“ sagði Jóhann léttur. „Ég er bara á fínum bíl og kvarta ekkert. Ég þarf engan Range Rover,“ sagði Jóhann Berg sem ekur um á Audi A5. „Það er ágætis kerra.“

Ísland mætir Sviss í undankeppni HM 2014 í Bern í kvöld Jóhann Berg vonast eftir þremur stigum en myndi sætta sig við eitt.

„Þeir verða örugglega meira með boltann og sækja á okkur. Við þurfum að verjast vel og beita góðum skyndisóknum. Þá erum við í góðum málum.“

Leikur Sviss og Íslands hefst klukkan 18.30 og verður í beinni textalýsingu hér á Vísi.