Guðlaugur Victor hafði betur gegn Jóhanni og Aroni

NEC Nijmegen gerði sér lítið fyrir og skellti AZ á heimavelli 3-2 í hollensku úrvalsdeildinni í fótbolta í dag. Ekkert íslenskt mark var skorað í leiknum en staðan í hálfleik var 1-1.

Marnick Vermijl kom NEC yfir á 17 mínútu en Roy Beerens jafnaði metin á 25. mínútu og var því jafnt í hálfleik.

Alireza Jahanbakhsh skoraði tvisvar fyrir NEC á 53. mínútu og 72. áður en varamaðurinn Steven Berghuis minnnkaði muninn fyrir AZ á 81. mínútu.

Nær komst AZ ekki en Jóhann Berg Guðmundsson lék allan leikinn á vinstri kantinum fyrir AZ og fékk að líta gula spjaldið á 89. mínútu. Aron Jóhannsson lék líka allan leikinn en náði ekki að skora hjá vörn NEC með Guðlaug Victor Pálsson í broddi fylkingar.

NEC er enn á botni deildarinnar en nú með 12 stig, stigi á eftir ADO Den Haag og RKC Waalwijk. AZ er í 5. sæti með 24 stig og tapaði liðið mikilvægum stigum í toppbaráttunni en liðið er sex stigum á eftir toppliði Vitesse.