Tengdasonur Bjarna Ben kjörinn formaður SUS

Magnús Júlíusson, meistaranemi í verkfræði, var kjörinn formaður Sambands ungra sjálfstæðismanna til tveggja ára á 42. Sambandsþingi SUS sem lýkur í Borgarnesi í dag.

Magnús er kærasti Margrétar Bjarnadóttur, dóttur Bjarna Benendiktssonar formanns Sjálfstæðisflokksins og fjármálaráðherra landsins. Þau Magnús og Margrét hafa verið saman í hátt í þrjú ár að sögn Magnúsar.

„Honum leist vel á að ég byði fram, en þetta var nú bara að gerast svo ég hef ekki heyrt í honum eftir að úrslitin urðu ljós,“ segir Magnús.

Kærastan er með honum á þinginu og hún er að vonum stolt af sínum manni.

Magnús hlaut 58 atkvæði af 62 greiddum atkvæðum eða 94%. Davíð Þorláksson fráfarandi formaður gaf ekki kost á sér til endurkjörs.

Magnús segir að það hafi verið mikil mæting og þátttaka á þinginu og að hann sé þakklátur fyrir stuðninginn.

„Ég tek við góðu búi af Davíð, sem hefur stýrt SUS kröftuglega síðustu tvö árin,“ segir Magnús.

„Ég hlakka til að takast á við verkefnin sem eru framundan og ég tel að þar sem Sjálfstæðisflokkurinn er kominn í ríkisstjórn, sé enn mikilægara en áður að veita honum gott aðhald,“ segir hann.

Magnús er fæddur og uppalinn í Reykjavík. Hann útskrifaðist sem stúdent af stærðfræðibraut Verzlunarskóla Íslands og með B.Sc. gráðu í hátækniverkfræði frá Háskólanum í Reykjavík vorið 2011. Hann er nú að ljúka meistaranámi í sjálfbærum orkuvísindum innan vélaverkfræðideildar Konunglega Tækniháskólans í Stokkhólmi.