Van Basten: Alfreð er klár í slaginn í kvöld

Alfreð Finnogason, markahæsti leikmaður hollensku úrvalsdeildarinnar, er leikfær á ný og verður með SC Heerenveen í kvöld þegar liðið mætir ADO Den Haag í deildinni.

Alfreð hefur skorað 14 mörk í 11 leikjum í hollensku úrvalsdeildinni á þessu tímabili og er með tveggja marka forskot á næsta mann sem er Graziano Pellè hjá Feyenoord. Pellè skoraði 2 mörk í 3-1 sigri á PSV um síðustu helgi,.

Alfreð hefur misst af síðustu tveimur leikjum vegna meiðsla og því ekki spilað með Heerenveen eftir landsleikjahléið þar sem hann spilaði samtals 152 mínútur í leikjunum tveimur á móti Króatíu.

"Alfreð er nógu heill. Hann æfði með okkur og getur spilað þennan leik," sagði Marco van Basten, þjálfari Heerenveen. Alfreð hefur að glíma við meiðsli aftan í læri.

Nú er bara spurning hvort Alfreð komist hreinlega í liðið því Heerenveen vann 3-1 sigur á Go Ahead Eagles án hans um síðustu helgi. Liðið hafði gert jafntefli í fyrri tveimur leikjum sínum án íslenska landsliðsframherjans.

Luciano Slagveer var fremsti maður Heerenveen-liðsins í síðustu tveimur leikjum en skoraði ekki og hefur aðeins gert 1 mark i 13 leikjum í hollensku deildinni á tímabilinu. Alfreð ætti því að komast í liðið í kvöld.