Löw vill ekki taka þátt í Gullboltakosningunni

Joachim Löw, landsliðsþjálfari Þýskalands, hefur beðist undan því að nýta atkvæðisrétt sinn í kjöri FIFA á knattspyrnumanni ársins.

Þetta kemur fram í þýskum fjölmiðlum í dag en Löw treystir sér ekki til að taka hlutlausa ákvörðun, þar sem fimm leikmenn þýska landsliðsins eru tilnefndir og ekkert sem bannar honum að kjósa leikmenn frá eigin landi.

Þeir Philipp Lahm, Bastian Schweinsteiger, Manuel Neuer, Thomas Müller og Mesut Özil eru allir tilnefndir en aðeins má kjósa þrjá leikmenn í kosningunni. Löw vill því ekki gera upp á milli eigin leikmanna.

Löw tók þátt í fyrra og setti þá Özil í fyrsta sætið hjá sér, Neuer í annað og Spánverjann Xavi í þriðja sætið.

Landsliðsþjálfarar og -fyrirliðar taka þátt í kosningunni ásamt blaðamönnum.

Hér má lesa um þá 23 leikmenn sem eru tilnefndir í karlaflokki í ár en líklegast þykir að þeir Cristiano Ronaldo, Lionel Messi og Franck Ribery skipi efstu þrjú sætin í ár.