Fullyrt að Snowden fljúgi til Íslands

Øystein Jakobsen, fulltrúi norskra Pírata, fullyrðir að uppljóstrarinn Edward Snowden muni lenda á Gardemoen-flugvelli í Noregi í kvöld. Þaðan muni hann fljúga til Íslands.

Að sögn Aftenposten ætlar Jakobsen að hitta Snowden á flugvellinum, en hann lenti í Moskvu fyrir skömmu eftir flug frá Hong Kong.

Bandarísk stjórnvöld gáfu á föstudaginn út ákæru á hendur Snowden fyrir njósnir og fóru þess á leit við stjórnvöld í Hong Kong að þau handtækju hann.

Snowden hafði farið þar huldu höfði allt frá því að hann ljóstraði upp um stórfellt kerfisbundið eftirlit bandarískra stjórnvalda með síma- og netnotkun fjölda fólks.

Yfirvöld í Hong Kong vildu ekkert gefa upp um það í gær hvort að orðið yrði við beiðni Bandaríkjamanna um að handtaka Snowden.