Innlent

Maður finnur bara til svo mikillar reiði

Haukur Viðar Alfreðsson skrifar
Yavuz var kasólétt þegar hún hitti Bill Clinton, að sögn Þóru Arnórsdóttur.
Yavuz var kasólétt þegar hún hitti Bill Clinton, að sögn Þóru Arnórsdóttur.
Að minnsta kosti 62 eru látnir eftir gíslatökuna í Kenía, en liðsmenn skæruliðahreyfingarinnar Al Shabab réðust inn í verslanamiðstöð í Naíróbí á laugardag.

Meðal hinna látnu voru þau Elif Yavuz og Ross Langdon, verðandi foreldrar sem voru á leið í mæðraskoðun í verslanamiðstöðinni, en Yavuz var komin átta og hálfan mánuð á leið með sitt fyrsta barn þegar hún lést.

Þóra Arnórsdóttir var bekkjarsystir Yavuz í Johns Hopkins-háskóla en þær lærðu saman þróunarhagfræði og alþjóðastjórnmál á árunum 2002 til 2004. Yavuz kom frá Hollandi og var 33 ára þegar hún lést.

Yavuz og Langdon voru á leið í mæðraskoðun í verslanamiðstöðinni þegar skæruliðarnir hófu skothríð.
„Mörg bekkjarsystkini mín starfa við erfiðar aðstæður um allan heim en Yavuz var ekki á átakasvæði,“ segir Þóra. „Þetta var því hræðileg tilviljun að hún skyldi hafa verið þarna og maður bjóst ekki við slíkum fréttum.“

Bekkjarsysturnar fylgdust hvor með annarri í gegnum samfélagsmiðla eftir skólagönguna og segir Þóra Yavuz hafa verið mikinn töffara. „Hún var algjör nagli og búin að vinna fyrir Clinton-stofnunina og Bill & Melinda-stofnunina, hafði starfað mikið í Afríku, og var að klára doktor frá Harvard í lýðheilsufræði. Hún var til dæmis kasólétt þegar hún tók í höndina á Clinton. Alveg brilljant manneskja.“

Þóra er slegin yfir fréttunum frá Naíróbí. „Maður finnur bara til svo mikillar reiði. En þetta minnir mann á að það er ekki þannig að þó hlutirnir gerist í útlöndum að þá komi þeir manni ekki við.“




Fleiri fréttir

Sjá meira


×