Grunaðir þjófar úrskurðaðir í farbann

Héraðsdómur Reykjavíkur úrskurðaði í dag tvo pólska karlmenn í fjögurra vikna farbann, en þeir hafa setið í gæsluvarðhaldi ásamt einum öðrum frá því 20. desember. Lögreglan fór ekki fram á framlengingu á gæsluvarðhaldinu en óskaði þess í stað tveir af þeim skyldu sæta farbanni.

Mennirnir eru grunaðir um að eiga aðild að fjölda innbrota og þjófnaða úr verslunum á höfuðborgarsvæðinu og á Akureyri. Mennirnir voru handteknir á Vesturlandsvegi að kvöldi 17. desember síðastliðins en þeir voru á leið til borgarinnar frá Akureyri. Nokkrum klukkutímum áður hafði verið tilkynnt um innbrot í tvö hús á Akureyri og bankað upp á í að minnsta kosti tveimur húsum til viðbótar.

Rannsókn lögreglunnar er nokkuð umfangsmikil, en henni fer að ljúka á næstu dögum og verður gefin út ákæra á næstu vikum.