Kvennalandsliðið fellur um fjögur sæti

Ísland situr í nítjánda sæti á nýjum styrkleikalista Alþjóðaknattspyrnusambandsins, FIFA, sem var gefinn út í morgun.

Ísland féll um fjögur sæti frá síðustu útgáfu og dettur niður fyrir Spán, Nýja Sjáland, Suður-Kóreu og Kína. Stelpurnar hafa ekki verið svo neðarlega á listanum síðan í júní 2009.

Freyr Alexandersson tók við starfi landsliðsþjálfara í haust en undir hans stjórn tapaði Ísland fyrir Sviss á heimavelli í lok september en vann svo Serba á útivelli í október.

Sviss er í 22. sæti listans og fer upp um þrjú sæti en Serbar sitja í 44. sæti.