Dagný lagði upp mark og Florida State komst í úrslitaleikinn

Dagný Brynjarsdóttir og Berglind Björg Þorvaldsdóttir eru komnar í úrslitaleikinn í bandaríska háskólafótboltanum eftir að Florida State liðið vann 3-2 sigur á Virginia Tech í undanúrslitaleiknum í nótt. Florida State mætir UCLA í úrslitaleiknum annað kvöld.

Dagný lagði upp annað mark síns liðs og Berglind Björg átti flest skot hjá sínu liði í leiknum. Báðar voru þær í byrjunarliðinu, Dagný spilaði allan leikinn en Berglind var tekin af velli tíu mínútum fyrir leikslok.

Jamia Fields skoraði tvö mörk fyrir Florida State þar á meðal sigurmarkið sjö mínútum fyrir leikslok en Fields hafði á heldur betur heppnina með sér eins og sjá má í myndbandinu hér fyrir neðan. Þar er einnig hægt að sjá stoðsendinguna hjá Dagnýju sem var frábær.

Virginia Tech komst yfir í leiknum en Florida State svaraði með tveimur mörkum áður en Virginia Tech jafnaði á ný.

Berglind Björg Þorvaldsdóttir átti 3 af 9 skotum Florida State þar af fór eitt þeirra á markið. Dagný reyndi tvö skot en hvorugt þeirra fór á markið.

Þetta er í fyrsta sinn síðan 2007 að skólalið Florida State fer alla leið í úrslitaleikinn en hann hefst klukkan átta annað kvöld.