Berglind og Dagný þurftu að sætta sig við silfur eftir gullmark

Gullmark réð úrslitum þegar UCLA vann 1-0 sigur á Florida State í úrslitaleik NCAA mótsins í bandaríska háskólaboltans í Cary í Norður-Karólínu í kvöld.

Berglind Björg Þorvaldsdóttir og Dagný Brynjarsdóttir voru venju samkvæmt í byrjunarliði Florida State sem lék í dag til úrslita í fyrsta skipti. Hvítklæddu stelpurnar frá Flórída voru í töluverðu basli lengst af í leiknum og gekk illa að finna taktinn gegn sterkum andstæðingi.

Í tvígang skall boltinn í tréverkinu á marki Florida State í fyrri hálfleik þar sem stelpurnar af vesturströndinni voru töluvert sterkari aðilinn. Dagný átti eitt skot að marki í fyrri hálfleik og Berglind annað í þeim síðari sem var ekki ósvipaður þeim fyrri. UCLA sótti meira en gekk illa að galopna vörnina.

Markalaust var að loknum venjulegum leiktíma svo framlengja varð leikinn Á sjöundu mínútu í framlengingunni réðust úrslitin á gullmarki Lavrusky sem komst ein gegn markverði Florida State eftir góða sendingu. Fögnuður þeirra bláklæddu var að vonum gríðarlegur en Berglind, Dagný og félagar að sama skapi vonsviknar eftir mikla baráttu.

Florida State komst í fyrsta skipti í úrslitaleikinn í ár eftir að hafa tapað í undanúrslitum undanfarin tvö tímabil. Þeim tókst ekki að skapa sér hættuleg færi í leiknum og var sigur UCLA verðskuldaður þrátt fyrir hetjulega baráttu austurstrandarliðsins.

Berglind og Dagný hafa vakið mikla athygli fyrir framgöngu sína á tímabilinu. Berglind skoraði sérstaklega mikið í deildinni og Dagný hefur verið í lykilhlutverki og hlotið viðurkenningar fyrir góða frammistöðu. Þær stöllur hefðu getað komist í fámennan hóp íslenskra kvenna sem orðið hafa skólameistarar í knattspyrnu vestanhafs. Þær Guðrún Sóley Gunnarsdóttir og Rakel Ögmundsdóttir þurfa að bíða í að minnsta kosti annað ár eftir nýjum félaga í klúbbnum. Dagný á eitt ár eftir í háskólaboltanum en Berglind getur leikið í þrjú til viðbótar.

Textalýsing frá framlengingunni7. mínútur liðnar af fyrri hálfleik: UCLA vinnur! Miðvörður UCLA brunar upp völlinn, finnur framherja sem klárar vel. Gull mark og UCLA meistari.

6. mínútur liðnar af fyrri hálfleik: BJARGAÐ Á LÍNU! Hornspyrna UCLA skapar stórhættu. Markvörðurinn nær ekki að kýla boltann almennilega frá marki. Skoti úr þröngu færi er bjargað á línu. ÚFF. Þarna munaði mjóu. Enn sleppa okkar stelpur með skrekkinn.

5 mínútur liðnar af fyrri hálfleik: Berglind vinnur boltann framarlega á vellinum og leggur til atlögu ein gegn miðverði UCLA. Sá hefur of lítið fyrir því að hirða af henni boltann.

3 mínútur liðnar af fyrri hálfleik: Bláklæddir leikmenn UCLA eru sterkari aðilinn og töluverð þreytumerki á Florida State. Þær tapa boltanum of auðveldlega og fá sókn eftir sókn á sig.

Framlenging hafin: Það er töluverður vindur og rigning í Norður-Karólínu. Okkar stelpur í Florida State eru með vindinn í bakið. Leiknar verða 2x10 mínútur með gullmarksreglunni, þ.e. verði mark skorað þá er það sigurmarkið og leik er lokið. Verði enn markalaust eftir framlengingu verður gripið til vítaspyrnukeppni.