Dagný skoraði sigurmarkið og tryggði titilinn | Myndband

Landsliðskonan Dagný Brynjarsdóttir skoraði eina mark Florida Sate háskólans er liðið vann 1-0 sigur á Virginia Tech. Með sigrinum tryggði liðið sér sigur í Atlantshafsdeildinni ACC.

Dagný skoraði eina markið strax eftir níu mínútuna leik með skoti rétt innan teigs eftir lagleg tilþrif. Markið var hennar tíunda á tímabilinu en nokkru áður hafði markvörður mótherjans varið skot hennar utan af velli með tilþrifum.

Dagný fær seint jólakort frá Virginia Tech liðinu því hún skoraði einnig bæði mörkin í 2-1 sigri Florida State í október. Dagný komst nærri því að skora í síðari hálfleik en hörkuskalli hennar var vel varinn.

Berglind Björg Þorvaldsdóttir var einnig í liðinu og var í tvígang aðgangshörð í fyrri hálfleik. Mark Dagnýjar og viðtal við þjálfara liðsins má sjá í spilaranum að ofan.