Guðlaugur Victor lagði upp mark í endurkomu NEC

Guðlaugur Victor Pálsson og félagar í NEC Nijmegen lentu 2-0 undir í fyrri hálfleik á útivelli á móti toppliði Twente en tókst samt á fá eitthvað út úr leiknum. Twente og NEC gerðu 2-2 jafntefli í hollensku úrvalsdeildinni í kvöld.

Guðlaugur Victor lék allan tímann á miðju NEC Nijmegen og lagði upp markið sem kom liðinu aftur inn í leikinn.

Shadrach Eghan og Quincy Promes komu Twente í 2-0 á fyrstu 34 mínútum leiksins og allt stefndi í að Twente yrði áfram í toppsæti deildarinnar.

Liðsmenn NEC sem voru ellefu stigum og sextán sætum neðar í töflunni gáfust ekki upp og tókst að jafna leikinn í seinni hálfleiknum.

Guðlaugur Victor lagði upp fyrra markið sem Sören Rieks skoraði á 55. mínútu og aðeins fimm mínútum síðar lagði Rieks upp mark fyrir Jakob Jantscher.

NEC Nijmegen fékk aðeins 4 stig út úr fyrstu 9 leikjum sínum en hefur nú náð í fimm stig út úr síðustu þremur leikjum sínum. Liðið situr samt ennþá í botnsætinu.