Jón Baldvin íhugar málaferli á hendur HÍ

Jón Baldvin Hannibalsson íhugar að fara í mál á hendur Háskóla Íslands vegna afgreiðslu mála hans þar, samkvæmt heimildum fréttastofu. Jón Baldvin ritaði grein sem birtist í Fréttablaðinu um helgina þar sem hann gerir grein fyrir málinu eins og það horfir við honum. Mun hann hafa fundað með lögmanni sínum vegna þessa en Jón Baldvin vildi ekki staðfesta þetta í samtali við fréttastofu -- sagði málin skýrast í vikunni.

Augu manna beinast nú að stöðu Háskóla Íslands og þar með Kristínu Ingólfsdóttur, rektor HÍ, en hún mun ekki tjá sig fyrr en að loknum deildarfundi félagsvísindadeildar. Kristín baðst undan viðtali í morgun, hún vísaði til stjórnsýslu skólans; þess að deildirnar hafi faglegt sjálfstæði meðal annars er varðar skipulagningu kennslu.

Háskóli Íslands sætir nú harðri gagnrýni meðal annars frá háskólamönnum og alþingismönnum.Þorvaldur Gylfason hagfræðiprófessor, Stefán Ólafsson félagsfræðiprófessor og Ögmundur Jónasson, fyrrverandi innanríkisráðherra eru meðal margra sem hafa gagnrýnt málsmeðferðina opinberlega. Þorvaldur gengur svo langt að segja skólann verða að taka sér tak og rektor beri að biðjast afsökunar ellegar segja af sér.

Brynjar Níelsson þingmaður bættist svo í stækkandi hóp gagnrýnenda með grein í gærkvöldi. Hann bendir á að Jón Baldvin segi kynjafræðiskor Háskóla Íslands hafi staðið gegn kennslu hans. Brynjar segir það ekki háskólum til framdráttar að fóstra stjórnmálahópa sem telja pólitíska hugmyndafræði sína til vísinda og fræða.

Daði Már Kristófersson forseti félagsvísindadeildar sagði í fréttum Stöðvar 2 um helgina að HÍ tæki ekki tillit til mála Jóns Baldvins sem slíkra, ákvörðunin um að hann héldi ekki gestafyrirlestra við háskólann næsta vetur væri fyrst og fremst tekin til að gera skólanum kleift að sinna hlutverki sínu og tryggja nauðsynlegan frið um starfsemina. Daði fundar nú með sínu fólki á deildarfundi í Háskóla Íslands, en rektor mun ekki tjá sig um mál Jóns Baldvins fyrr en niðurstaða þess fundar liggur fyrir.