Alveg sama hver fær sviðsljósið

Jóhann Berg Guðmundsson fór á kostum í gærkvöldi þegar AZ Alkmaar lagði Atromitos frá Aþenu í fyrri leik liðanna í Evrópudeildinni í knattspyrnu.

Jóhann skoraði tvö mörk og Aron Jóhannsson eitt. Lokatölurnar urðu 3-1 gestunum frá Hollandi í vil.

„Þetta var mjög gott kvöld bæði hjá mér og liðinu,“ sagði Jóhann Berg í samtali við Fréttablaðið í gærkvöldi. Kantmaðurinn úr Kópavogi sagði leikinn hafa verið lokaðan í fyrri hálfleik en mark sitt snemma í síðari hálfleik hafi opnað leikinn upp á gátt.

„Aron skoraði eftir góða skyndisókn og þá lögðu þeir allt kapp á sóknarleikinn. Ætluðu svo sannarlega að jafna,“ segir Jóhann Berg.

Atromitos minnkaði muninn með vítaspyrnu og hélt áfram sókn sinni. Í viðbótartíma nýtti Jóhann Berg sér sóknarþunga heimaliðsins, komst einn gegn markverðinum og skoraði auðveldlega. 3-1 útisigur eru sérdeilis góð úrslit fyrir síðari leikinn í Alkmaar.

Kastljósið undanfarnar vikur hefur beinst að Aroni, enda ekki skrítið. Aron kaus að spila með bandaríska landsliðinu en ekki því íslenska. Auk þess var mark Arons í gærkvöldi hans fimmta í fimm leikjum á tímabilinu og athygli fjölmiðla á nýjasta landsliðsmanni Bandaríkjanna því skiljanleg.

„Mér er alveg sama hver fær sviðsljósið. Á meðan ég spila fótbolta og vinn vinnuna mína skiptir athygli engu máli. Auðvitað hefur Aron fengið mikla athygli en það er bara gaman fyrir hann,“ segir Jóhann Berg.

Íslenski landsliðsmaðurinn hefur verið í byrjunarliðinu í öllum leikjum AZ á leiktíðinni. Þeir Aron hafa lagt upp mörk hvor fyrir annan og virðast ná vel saman. Jóhann segir sjálfstraustið hjá sér mikið þessa dagana.

„Þegar þú spilar og skorar mörk þá kemur sjálfstraustið. Það sást kannski í landsleiknum heima gegn Færeyjum á dögunum,“ segir Jóhann.

Gengi í fótbolta ráðist að miklu leyti af sjálfstrausti. Jóhann var duglegur við að leggja upp færi fyrir liðsfélaga sína í umræddum leik gegn Færeyjum, sem vannst þó aðeins með minnsta mun, 1-0.

„Auðvitað áttum við að vinna þennan leik fjögur eða fimm núll,“ segir Jóhann Berg um leikinn sem íslensku strákarnir spiluðu vel. Góðs viti fyrir næsta leik liðsins í undankeppninni, gegn Sviss ytra þann 6. september.

„Það væri mjög gott að ná í stig í Sviss og vinna svo Albaníu í kjölfarið heima,“ segir Kópavogsbúinn en markmið liðsins er yfirlýst og skýrt.

„Andinn í hópnum er mjög góður og allir eru staðráðnir í að ná öðru sætinu. Við teljum okkur vera með hóp til þess,“ segir Jóhann.

Kolbeinn Sigþórsson var einn þeirra sem brenndu af í dauðafærum í leiknum gegn Færeyjum. Nokkur markaþurrð hefur verið hjá Kolbeini, sem skoraði síðast fyrir Ísland gegn Færeyjum fyrir ári. Enginn efast þó um hæfileika sóknarmannsins og mikilvægi fyrir íslenska liðið.

„Á meðan við spilum vel og vinnum skiptir ekki máli hver skorar,“ segir Jóhann. Þeir Kolbeinn eru góðir vinir og náðu vel saman þegar Kolbeinn var einnig í röðum AZ Alkmaar.

„Ef við fáum mörk frá honum verður þetta enn betra.“