„Buðust til að græja þessa ungu konu fyrir skólann í haust“

„Verslunin A4 hafði samband við mig í gær og þau hafa boðist til að græja þessa ungu konu fyrir skólann í haust,“ segir Guðrún Axfjörð Elínardóttir, ráðgjafi hjá Drekaslóð, fræðslu- og þjónustumiðstöð fyrir þolendur ofbeldis.

Í vikunni auglýsti Guðrún eftir aukabókum frá þeim sem verið hafa í námi sem skila mætti á skiptibókamörkuðum fyrir inneignarnótu. Skjólstæðingur Guðrúnar, rétt rúmlega tvítug, einstæð móðir sem varð fyrir einelti, er að hefja nám að nýju en gat ekki staðið straum af kostnaðinum sem fylgir skólabókakaupum. Því var ákveðið að reyna að létta undir með henni.

„Ég hrindi þessari söfnun af stað vegna einnar duglegrar og hugrakkrar konu sem hreinlega má ekki missa af þessu tækifæri til menntunar sem hún hefur nú fengið, skrifar Guðrún um leið og hún óskar eftir aukabókum, og bætir því við að ef söfnunin gangi vel sé draumurinn sá að til verði sjóður sem fleiri geti sótt í til stuðnings.

„Það sem upphaflega átti að vera ákveðin redding fyrir fáeina nemendur gaf okkur þá hugmynd að stofna skólabókasafn fyrir skjólstæðinga Drekaslóðar,“ segir Guðrún í samtali við fréttastofu Vísis. „Um er að ræða karla jafnt sem konur á öllum aldri og úr öllum stigum þjóðfélagsins. Það eru ekki síður ungir karlmenn sem eiga erfitt með að fóta sig í námi að nýju eftir að hafa flosnað upp úr því.“

Guðrún segir að enn sé tekið við bókum og í raun sé engin lokadagsetning á því hvenær hægt sé að skila þeim inn. Þó vandræði ungu stúlkunnar hafi verið kveikjan að söfnuninni séu margir aðrir sem geti notfært sér aukabækurnar.

Fyrir þá sem eiga engar bækur sem eru gjaldgengar á skiptibókamarkaði en langar samt að hjálpa til er hægt að leggja inn á reikning Drekaslóðar. Allar nánari upplýsingar má finna á vefsíðu Drekaslóðar.

Guðrún minnir svo á Reykjavíkurmaraþonið á morgun en þar hlaupa nokkrir í nafni Drekaslóðar. Hægt er að heita á hlauparana til miðnættis á mánudag