Íbúðalánasjóður fær bætur fyrir lækkun lánasafns vegna aðgerða stjórnvalda

Sendifulltrúi Alþjóðagjaldeyrissjóðsins á Íslandi telur að aðgerðir stjórnvalda vegna skuldugra heimila muni hafa verulega neikvæð áhrif á stöðu Íbúðalánasjóðs. Forstjóri sjóðsins segir að honum verði bætt upp þau áhrif sem aðgerðirnar hafa.

Seðlabankinn og greiningardeildir bankanna hafa undanfarna daga fullyrt að boðaðar aðgerðir til niðurfærslu lána heimilanna muni auka verðbólgu og þenslu í samfélaginu. Þá hefur legið fyrir að lækkun höfuðstóls íbúðalána muni hafa áhrif á lánasafn Íbúðalánasjóðs.

Í frétt Bloombergs um þetta mál er haft eftir Dariu Zakharova sendifulltrúa Alþjóðagjaldeyrissjóðsins að aðgerðirnar muni auka áhættu Íbúðalánasjóðs og kalla á frekari innspítingu fjármagns frá ríkissjóði. AGS hafi séð áætlanir um að setja þurfi 40 milljarða inn í Íbúðalánasjóð á næstu fjórum árum vegna aðgerðanna, sem bætist við önnur framllög ríkissjóðs vegna eftirmála hrunsins.

Sigurður Erlingsson forstjóri Íbúðalánasjoðs vill ekki tjá sig um tölulegar fullyrðingar Bloomberg en segir ekki  nýtt að bæta þurfi sjóðnum minnkandi lánasafn með aðgerðum stjórnvalda. Það hafi komið fram.

En hvaðaáhrif munuþessar aðgerðir hafaáÍbúðalánasjóð?

„Þær hafa þau áhrif að við verðum að færa niður lán í lánasafninu annars vegar og síðan fáum við svo mótframlag frá ríkissjóði. Það er að segja fullar bætur fyrir þau lán sem við þurfum að færa niður. Þannig að nettóáhrifin eru þau að lánasafnið minnkar og við fáum fjármuni á móti því,“ segir Sigurður.

Heildaráhrifin á efnahagsreikninginn séu því lítil. En burt séð frá væntanlegum aðgerðum hefur staða Íbúðalánasjóðs verið mjög erfið undanfarin ár vegna mikilla uppgreiðslna lána og óhagstæðs vaxtamunar á útlánum og innlánum sjóðsins.

„Það liggur fyrir að verið er að horfa á að leggja inn 4,5 milljarða á næsta ári. Það er í sínum eðlilega farvegi. Það er vegna þess að sjóðurinn er enn að fara í gegnum um eftirköstin af hruninu,“ segir Sigurður.Það sjái fyrir endann á því áfalli sem sjóðurinn varð fyrir og menn sjái fram á að sjóðurinn nái jafnvægi.

„Já, já það eru ýmis jákvæð teikn. Við höfum séð vanskil fara lækkandi og við sjáum að það er aðeins að hægja á innstreymi fullnustueigna. Þannig að það eru klárlega jákvæðar vísbendingar um að það versta sé afstaðið og það fari að birta til í þessum rekstri,“ segir Sigurður Erlingsson.