Jóhann Berg og Aron í tapliði

AZ tapaði 2-0 á útivelli gegn Heracles í hollensku úrvalsdeildinni í fótbolta í dag. Jóhann Berg Guðmundsson og Aron Jóhannsson léku allan leikinn fyrir AZ.

Bryan Linssen kom Heracles yfir á 12. mínútu og var staðan í hálfleik 1-0.

AZ sótti mikið í leiknum og var Jóhann Berg áberandi í sóknarleik liðsins en liðinu tókst ekki að jafna og það var á fimmtu mínútu uppbótartíma að Oussama Tannane gerði út um leikinn með öðru marki Heracles í leiknum.

AZ heldur áfram að dragast aftur úr í toppbaráttunni en AZ er í 8. sæti, 12 stigum á eftir toppliði Vitesse Arnhem.

Heracles lyfti sér upp í 11. sæti deildarinnar með sigrinum og er nú fjórum stigum frá fallsæti.