Töpuð stig hjá Íslendingaliðunum í Belgíu

Ekki gekk vel hjá Íslendingaliðunum í Belgíu í kvöld. Zulte-Waregem náði aðeins jafntefli 1-1 á útivelli gegn 10 leikmönnum Kortrijk og Genk skellti Oh Leuven 3-0 í Genk.

Ólafur Ingi Skúlason spilaði fyrri hálfleikinn fyrir Zulte-Waregem en var skipt útaf í hálfleik. Stijn De Smet kom Kortrijk yfir á 19. mínútu en hann fékk að líta rauða spjaldið á 58. mínútu.

Zulte-Waregem átti í vandræðum með að nýta sér liðsmuninn en náði þó að jafna metin þegar tvær mínútur voru eftir af leiknum. Þá skoraði Mahamadou Habibou fyrir Zulte-Waregem sem er í þriðja sæti deildarinnar, fjórum stigum á eftir toppliði Standard Liege.

Stefán Gíslason kom inn á sem varamaður í hálfleik fyrir Oh Leuven en staðan í hálfleik hafði verið markalaus.

Bennard Kumordzi kom Genk yfir á 49. mínútu og Julien Gorius bætti öðru marki við á 68. mínútu. Gorius gulltryggði sigur Genk á 87. mínútu með öðru marki sínu. Oh Leuven er í 14. sæti með 15 stig.