Eins árs og byrjaður að æfa

Bryce Brites er ekki nema 20 mánaða gamall en er þegar byrjaður að mæta á æfingar hjá belgísku félagsliði.

FC Racing Boxberg segir frá þessu á heimasíðu sinni og segir hinn unga Bryce vera langyngsta meðlim belgíska knattspyrnusambandsins.

„Bryce sparkar í boltann eins og hann væri fjögurra eða fimm ára gamall. Knattleikni hans er með ólíkindum,“ er haft eftir Dany Vodnyk, formanni félagsins.

Bryce byrjaði að labba fyrir aðeins hálfu ári síðan og getur ekki enn sagt bolti á móðurmáli sínu. Engu að síður er honum líkt við sjálfan Lionel Messi á heimasíðu Racing Boxberg.

Forráðamenn félagsins hafa svo mikla trú á stráknum að hann fær nú að æfa með fjögurra og fimm ára drengjum.