Markahetja Norður-Íra hættur

Markahrókurinn David Healy hefur ákveðið að leggja skóna á hilluna eftir að hafa verið án félags síðan í sumar.

Healy skoraði alls 36 mörk í 95 leikjum með norður-írska landsliðinu og er markahæsti leikmaður liðsins frá upphafi. Hann er 34 ára gamall og var síðast á mála hjá Bury.

Hans helstu afrek með landsliðinu var að tryggja því 1-0 sigur á Englandi í undankeppni HM á Windsor Park árið 2005. Þá skoraði hann alls þrettán mörk í undankeppni EM 2008 sem er met í Evrópu.

„Mér fannst markið gegn Englandi vera eins og hvert annað mark á sínum tíma. En fólk var enn að stöðva mig út á götu mörgum mánuðum síðar og spyrja mig út í markið,“ rifjar Healy upp.

„Þá fann ég hversu heppinn og stoltur ég var af markinu. Svo í næstu undankeppni fór einfaldlega allt inn hjá mér.“

Healy hóf feril sinn hjá unglingaliði Manchester United en fór til Preston North End árið 2001 eftir aðeins þrjá leiki með aðalliði United.

Healy spilaði fjórum sinnum gegn Íslandi á ferlinum og skoraði alls tvö mörk.

Hann lék einnig með Leeds, Fulham, Sunderland, Ipswich, Doncaster, Rangers og Bury á ferlinum.