Zidane vonar að Frakkar lendi í erfiðum riðli

Þjóðirnar sem verða í pottinum í dag þegar dregið verður í riðla í úrslitakeppni HM í Brasilíu óska sér örugglega eins léttan riðil og mögulegt er næsta sumar.

Zinedine Zidane, lykilmaður í heimsmeistaraliði Frakka, er þó ekki í þeim hópi því hann vill að franska landsliðið lendi í erfiðum riðli á HM næsta sumar.

Það er ekki það að Zidane vilji að franska liðið sitji eftir í riðlinum og komist ekki í sextán liða úrslitin heldur hefur hann áhyggjur af hugsanlegu vanmati landa sinna ef að riðilinn er of "léttur."

„Það er ekkert til sem heitir góður dráttur. Ég vil samt að franska liðið endi í erfiðum riðli svo að þeir líti ekki á sem svo að þeir séu að fara að spila við lítil lið í stað þess að hugsa um að komast áfram upp úr riðlinum," sagði Zinedine Zidane á blaðamannafundi í tengslum við dráttinn í Brasilíu.

„Franska landsliðið þarf að ætla sér stóra hluti frá fyrsta leik. Kannski væri ekki gott fyrir aðrar þjóðir að enda í erfiðum riðli en það er það besta í stöðunni fyrir Frakka," sagði Zidane.

Frakkar eru ekki í efsta styrkleikaflokki og gætu því lent í mjög erfiðum riðli þegar dregið verður í dag. Martröð Frakka væri líklega að enda í riðli með Brasilíu, Hollandi og Japan.