Ronaldo vill sleppa við Spán, Brasilíu og Þýskaland

Cristiano Ronaldo er á því að Spánn, Brasilía og Þýskaland séu sigurstranglegustu liðin á HM í fótbolta í Brasilíu næsta sumar en það verður dregið í riðli í keppninni í dag.

Það er einkum Ronaldo að þakka að Portúgalar eru með í pottinum því hann skoraði öll fjögur mörkin þegar liðið sló Svíþjóð út í umspilsleikjunum um laust sæti á HM 2014.

„Sigurstranglegustu þjóðirnar á HM næsta sumar eru Spánn, Brasilía og Þýskaland. Það væri því best að sleppa við þær en ég er þó ekki búinn að eyða miklum tíma í að velta þessu fyrir mér," sagði Cristiano Ronaldo við spænska blaðið Marca.

„Við verðum bara að bíða og sjá hvað kemur upp úr hattinum. Við höfum trú á okkar liði og ætlum okkur að komast upp úr riðlinum. Vonandi sleppum við samt við bestu þjóðirnar," sagði Ronaldo.

Átta þjóðir eru í efsta styrkleikaflokki og Portúgal mun mæta einni þeirra. Þær eru Brasilía, Spánn, Argentína, Belgía, Kólumbía, Þýskaland, Sviss og Úrúgvæ.