Dóttir Van der Vaart fæddist andvana

Hollenski landsliðsmaðurinn Rafael van der Vaart og kona hans Sabine Boularouz syrgja nú dóttur sína sem fæddist andvana í fyrrinótt. Þau staðfestu þetta í yfirlýsingu sem var send þýskum fjölmiðlum í morgun.

Rafael van der Vaart er því ekki í leikmannahópi Hamburg sem mætir Augsburg í þýsku úrvalsdeildinni í dag.

„Þetta er mikill missir og mjög sárt," sagði í yfirlýsingunni frá þeim Rafael og Sabine.

„Þetta er mjög sorglegt. Þegar svona stendur á þá er fótboltinn aukaatriði. Við munum reyna okkar besta í að styðja við bak hans," sagði Oliver Kreuzer, íþróttastjóri Hamburg í sömu yfirlýsingu.

Þetta er í annað skiptið sem Sabine Boularouz fæðir andvana dóttur en það gerðist einnig hjá henni fyrir fimm árum þegar hún var í hjónabandi með fótboltamanninum  Khalid Boularouz.

Rafael van der Vaart á soninn Damián Rafael með fyrrum eiginkonu sinni Sylvie Meis en Damián er orðinn 7 ára gamall.

Rafael van der Vaart hefur skorað 6 mörk og gefið 6 stoðsendingar í 12 deildarleikjum með Hamburger SV á leiktíðinni. Hann hefur spilað yfir hundrað landsleiki fyrir Holland.