Blóðug slagsmál í Brasilíu

Það varð að stöðva leik Atletico Paranense og Vasco de Gama í brasilíska boltanum í klukkutíma í gær þar sem allt var orðið vitlaust á áhorfendapöllunum.

Mikil slagsmál brutust út á pöllunum og það tók lögreglu drjúgan tíma að ná stjórn á ástandinu.

Einn áhorfandi slasaðist illa og varð þyrla að lenda á vellinum sem fór með hann á sjúkrahús. Þrír aðrir áhorfendur voru fluttir á spítala.

Svona slagsmál eru því miður algeng sjón í brasilíska boltanum og gengur knattspyrnuyfirvöldum þar í landi illa að breyta hegðun áhorfendanna.

"Það er sorglegt að sjá svona uppákomur rétt áður en við höldum HM. Ég er í áfalli, þetta er ekki hluti af íþróttinni," sagði þjálfari Vasco de Gama.