Dómari í bann fyrir umdeilda frammistöðu

Búlgarska knattspyrnusambandið hefur sett einn fremsta dómara landsins, Svetoslav Todorov, í ótímabundið bann eftir frammistöðu hans í deildarleik um helgina. Reuters greinir frá.

Todorov dæmdi viðureign Cherno More Varna og CSKA Sofia sem lauk með 2-1 heimasigri Cherno More. Bæði mörk heimamanna þóttu afar umdeild.

„Samviska mín er hrein,“ sagði Todorov að leik loknum en Búlgarinn er einn af UEFA dómurum Búlgara. „Ég dæmdi miðað við það sem ég sá.“

Heimamenn skoruðu fyrra mark sitt úr aukaspyrnu þar sem leikmaður heimaliðsins henti sér í jörðina af litlu tilefni. Sá viðurkenndi óheiðarleika sinn í viðtali eftir leik. Þá skoruðu heimamenn sigurmarkið úr vítaspyrnu eftir litla snertingu.

Gestirnir voru æfir yfir því að fá ekki vítaspyrnu í síðari hálfleik, fullkomlega löglegt mark var dæmt af auk þess sem leikmanni heimaliðsins var ekki refsað fyrir að slá til mótherja. Fór svo að þjálfara gestaliðsins var vísað upp í stúku fyrir mótmæli seint í leiknum.

Ekki liggur fyrir hve langt bann Todorov mun vara. Annar aðstoðardómaranna fékk hins vegar fimm leikja bann.