Umfjöllun og myndasyrpa: Ísland - Færeyjar 1-0

Ísland bætti við 23. sigrinum á frændum okkar Færeyingum þegar þjóðirnar mættust í vináttulandsleik í Laugardalnum í kvöld en þeir hafa flestir verið skemmtilegri og meira sannfærandi en þessi leikur liðanna. Kolbeinn Sigþórsson skoraði eina mark leiksins á 65. mínútu eftir að hann fékk skot Birkis Bjarnasonar í sig en auðvitað hefði mörkin geta orðið mun fleiri hefðu íslensku strákarnir nýtt færin sín betur.

Gunnar Nielsen, markvörður Færeyjar, varði oft mjög vel og bjargaði sínu liði frá mun stærra tapi. Sóknarleikur færeyska liðsins var hinsvegar ekki til útflutnings og það reyndi ekki mikið á íslensku vörnina í þessum leik.

Íslenska liðið spilaði mun hraðari og beinskeyttari leik í síðari hálfleik og þar munaði mestu um flotta innkomu Eiðs Smára Guðjohnsen. Hann lagði upp eina mark leiksins en var líka aðalmaðurinn í flestum bestu sóknum þess í seinni hálfleik.

Alfreð Finnbogason og Kolbeinn Sigþórsson gráta örugglega glötuð færi í nótt en mörkin detta vonandi bara inn í komandi leikjum í undankeppni HM:

Íslenska liðið tók völdin strax á móti mannmargri vörn færeyska liðsins en boltinn gekk oftast alltof hægt og færeysku varnarmennirnir fengu nær alltaf tíma til að stilla upp.

Kristinn Jónsson var reyndar fljótur að leggja upp fyrsta færið en skalli Birkis Bjarnasonar var beint á Gunnar Nielsen í markinu strax á fyrstu mínútu leiksins.

Alfreð Finnbogason komst í dauðfæri á 27. mínútu eftir hraða sókn og sendingu frá Kolbeini en skaut hátt yfir og hefði átt að gera betur. Jóhann Berg og Helgi Valur bjuggu til þessa góðu sókn.

Aðeins fjórum mínútum síðar var Alfreð aftur í fínu færi eftir fyrirgjöf Jóhanns Berg Guðmundssonar en Gunnar varði meistaralega frá honum.

Lars Lagerback gerði fjórar breytingar í hálfleik og setti meðal annars Eið Smára Guðjohnsen inn á miðjuna auk þess að skipta um þrjá af fjórum leikmönnum í varnarlínunni.

Það var allt annað að sjá leik liðsins með Eið Smára við stjórnvölinn inn á miðjunni. Það tók hann aðeins nokkrar mínútur að sýna liðsfélögum sínum hvernig á að spila boltanum í einni snertingu og um leið kom allt annar hraði og allt annar taktur í leik liðsins.

Alfreð Finnbogasyni virtist hinsvegar fyrirmunað að skora í þessum leik. Hann fékk tvö fín færi til viðbótar þar á meðal dauðafæri á markteig sem Gunnar Nielsen varði frábærlega í markinu.

Kolbeinn Sigþórsson skoraði eina mark leiksins á 65. mínútu eftir laglegan undirbúning frá Eiði Smára Guðjohsen. Eiður Smári vann vel með Jóhanni Berg og átti síðan frábæra sendingu út í teiginn á Birki sem skoraði. Við nánari athugun hafði boltinn viðkomu í Kolbeini Sigþórssyni á leið sinni í markið og því fær hann skráð á sig sitt níunda mark með landsliðinu.

Arnór Smárason kom inn á fyrir Alfreð strax eftir markið og átti nokkra fína spretti. Hann og Kolbeinn náðu líka betur saman og Kolbeinn fékk vissulega færi til þess að enda markaþurrð sína með íslenska landsliðinu.

Jóhann Berg Guðmundsson og Kolbeinn fóru illa með algjör dauðafæri undir lokin en íslenska liðið gat líka þakkað fyrir að Færeyingar stálu ekki stigi með óvæntri beittri sókn undir lokin.

Framundan eru fjórir leikir í undankeppni HM þar sem íslenska liðið á von um að komast á HM í Brasilíu. Þá þarf betri frammistöðu en í gær enda mótherjarnir miklu betri en þetta slaka færeyska landslið sem mætti á Laugardalsvöllinn í kvöld.