,,Alveg hræðilegt“

Kona á áttræðisaldri lést þegar eldur kom upp í hjólhýsi í Þjórsárdal í nótt. Ungur maður sem reyndi að bjarga konunni segir það hræðilegt að hafa vitað af einhverjum þarna inni.

Tilkynnt var um eldsvoðann á þriðja tímanum í nótt en hjólhýsið var staðsett í hjólhýsahverfi á Skriðufelli í Þjórsárdal. Mörg hýsi eru á svæðinu og varð nágrönnum bilt við þegar þeir heyrðu háværa hvelli.

„Við lítum hérna til hliðar og þá sjáum við bara þetta eldhaf. Þá leggjum við á sprett yfir þessa brú og komum að þessu. Þá var fortjaldið allt í ljósum loga,“segir Sveinn Enok Jóhannsson sem reyndi að bjarga konunni.

Sambýlisfólk á áttræðisaldri var inni í hjólhýsinu. Manninum tókst að komast út af sjálfsdáðum og var hann brunninn í andliti og á höndum. Konan var þá ennþá inni í hjólhýsinu.

„Og í geðshræringu þá ætlaði ég að reyna að brjóta niður glerið, en það er nú úr plasti þannig að það gekk illa. Á endanum náði ég bara að rífa það af. Ég hafði þá slökkt á gaskútunum sem voru þarna og ýtt þeim í burtu. Við mér tók eldhaf og ég tók andann og fór inn í hjólhýsið en það var svo mikill eldur. Ég þreifaði á rúmunum og fann ekki neitt en þá bara allt í einu tekur þessi hiti á móti mér, alveg svakalegur hiti og reykur og ég hoppa bara út úr hjólhýsinu og í kjölfarið á því fara kútarnir hérna hinum megin að springa,“ segir Sveinn.

Þetta er annað banaslysið á þessu ári í hjólhýsahverfinu í Þjórsárdal, en það eru aðeins þrír mánuðir síðan hjón á sjötugsaldri létust vegna súrefnisskorts inni í hjólhýsi sínu.

Konan sem lést í nótt og maðurinn hennar eru búin að vera með hjólhýsi á staðnum í mörg ár og eru þau þekkt þar fyrir að passa vel upp á sitt og og nágranna sína. Sveinn segir þau vera fólkið sem að skrúfaði fyrir gasið áður en það fór að sofa. „Reglufólk sem vissi alveg hvað það var að gera,“ segir hann.

Maðurinn var fluttur á slysadeild Landspítalans í Fossvogi þar sem gert var að sárum hans, en konan var úrskurðuð látin á staðnum. Málið er í rannsókn og nýtur rannsóknardeild lögreglunnar á Selfossi aðstoðar tæknideildar lögreglunar á höfuðborgarsvæðinu.

Ekki er unnt að greina frá nafni hinnar látnu að svo stöddu.