Ólafur Ingi hafði betur gegn Eiði Smára

Zulte Waregem vann í kvöld góðan sigur á Club Brugge, 4-3, á útivelli í belgísku úrvalsdeildinni í kvöld.

Liðin taka þátt í sex liða umspili um belgíska meistaratitilinn en þar á Zulte Waregem í harðri baráttu við Anderlecht og er nú tveimur stigum frá toppliðinu.

Eiður Smári Guðjohnsen var í byrjunarliði Club Brugge en var skipt af velli á 61. mínútu. Ólafur Ingi Skúlason kom inn á sem varamaður í liði Zulte Waregem stundarfjórðungi fyrir leikslok.

Mbaye Leye skoraði þrennu fyrir Zulte Waregem sem komst í 4-1 forystu í leiknum. Club Brugge skoraði tvö mörk undir lok leiksins en nær komust heimamenn ekki.