Búist við að Björn Valur bjóði sig fram

Fastlega er búist við að Björn Valur Gíslason þingmaður Vinstri grænna bjóði sig fram til varaformanns flokksins fyrir landsfund sem hefst á föstudag. Samkvæmt heimildum fréttastofu eiga sér einnig stað umræður meðal kvenna í flokknum um að kona á sviði sveitarstjórnarmála bjóði sig fram til embættisins og hafa nokkur nöfn verið nefnd í því sambandi.

Björn Valur færði sig um set úr Norðausturkjördæmi í Reykjavíkurkjördæmi í forvali flokksins fyrir nokkrum vikum en fékk ekki öruggt sæti. Uppstillingu VG í Reykjavíkurkjördæmunum er ekki lokið en rætt hefur verið að hífa Björn Val upp listann en niðurstaða hefur ekki fengist í það mál. Daníel Haukur Arnarsson, stjórnarmaður í Ungum Vinstri grænum, er hins vegar sá eini sem formlega hefur lýst yfir framboði.