Hámarkinu alls ekki náð

„Það er vilji allra að taka vel á móti ferðamönnum sem hingað koma," segir Halldór Arinbjarnarson, upplýsingastjóri Ferðamálastofu. „Og því fer fjarri að við séum að nálgast eitthvert hámark ferðamanna sem hingað koma á hverju ári."

Í nýlegri skýrslu Evrópska ferðamálaráðsins (ETC) um gengi ferðaþjónustunnar í fyrra kemur fram að hlutfallsleg fjölgun ferðamanna á Íslandi er langmest í Evrópu. Þeim fjölgaði um 20 prósent frá fyrra ári.

Aðspurður um ástæður þessarar miklu fjölgunar telur Halldór að um samspil nokkurra þátta sé að ræða. „Öflugt markaðasstarf erlendis er ein ástæðan. Hin er auðvitað sú að Ísland hefur verið mikið í umræðunni síðustu ár. Það hefur áhrif, þó svo að sú umræða hafi ekki alltaf verið á jákvæðum nótum."

Þá bendir Halldór að gengismálin hafi sannarlega haft góð áhrif, þó svo að verðlag sé hátt. Það hefur þó lagast á síðustu misserum. „Reykjavík er nú ekki lengur með dýrustu borgum heims," segir Halldór og bendir á að líklegt sé að ferðamönnunum muni fjölga á þessu ári. Það sé þó nauðsynlegt að dreifa komu ferðamanna utan háannar.

„Það hefur náðst árangur í þeim efnum. Vetrargestum hefur fjölgað verulega. Hið sama má auðvitað segja um sumargestina en við höfum náð að dreifa þessu betur yfir árið."

En eru þjónustuaðilar í ferðaþjónustunni í stakk búnir til að taka á móti slíkum fjölda ferðamanna?

„Í alþjóðlegu samhengi er Ísland ekki stórveldi í ferðaþjónustu," segir Halldór. „Það er verið að taka á þessum málum og við reynum nú að styrkja þessa innviði. En því fer fjarri að við séum komin að þolmörkum."