Stjórnarflokkarnir tilbúnir í breytingar

Til greina kemur að taka út einstök ákvæði í stjórnarskrárfrumvarpinu til að koma til móts við umsagnir Feneyjarnefndarinnar. Þingmenn stjórnarflokkanna hafa fundað um málið án niðurstöðu. Báðir stjórnarflokkarnir vilja klára málið á yfirstandandi þingi en fáir þingdagar eru eftir.

Skúli Magnússon, héraðsdómari og dósent við lagadeild HÍ, sagði í fréttum okkar í gær að drög að áliti Feneyjarnefndarinnar um stjórnarskrárfrumvarpið hefðu ekki komið sér á óvart.

Eins og fram hefur komið gerir Fenyjarnefndin alvarlegar athugasemdir við stjórnarskrárfrumvarpið.

„(Drögin) eru í góðu samræmi við það sem ég og fleiri hafa haldið fram frá því að þessar tillögur stjórnlagaráðs komu fram fyrst. Auðvitað er orðið löngu tímabært að menn stöðvi þessa vegferð og hugsi sinn gang alvarlega áður en lengra er haldið," sagði Skúli og átti þar við þingmenn.

Árni Þór Sigurðsson, þingmaður Vinstri grænna, segir í samtali við fréttastofu að þingmenn VG séu reiðubúnir að ná samkomulagi við aðra flokka um málið, en það sé „erfitt að fá nákvæmlega fram hvað sjálfstæðismenn og framsóknarmenn vilja."

Ekki tilbúnir í bútasaum

Heimildir fréttastofu innan þingflokks sjálfstæðismanna herma að þar á bæ séu menn lítt hrifnir að fara í einhvern „bútasaum með stjórnarskrárfrumvarpið." Bjarni Benediktsson, formaður Sjálfstæðisflokksins, sagði í fréttum okkar í gær að enginn frá stjórnarflokkunum hefði haft samband.

„Það hefur ekki verið rætt við okkur í neinni alvöru um breytt plan. Hingað til hefur málið verið keyrt áfram á þeirri forsendu að það þurfi heildarendurskoðun á stjórnarskránni," sagði Bjarni.

Á þingflokksfundi Samfylkingarinnar í gær var stjórnarskrármálið eina málið á dagskrá. Samkvæmt heimildum fréttastofu var þar rætt um að taka út einstök ákvæði úr frumvarpinu til að taka tillit til athugasemda Feneyjarnefndarinnar, en alvarlegustu athugasemdir nefndarinnar lúta að breyttri stjórnskipun landsins.

Vilja fyrirbyggja að „þjóðarviljinn" verði talaður í kaf

Heimildir fréttastofu herma að í þingflokki Samfylkingarinnar séu menn betur og betur farnir að gera sér grein fyrir að málið verði ekki þvingað í gegnum þingið í núverandi mynd. Taka verði tillit til athugasemda. Þetta byggir fréttastofan á samtölum við þingmenn. Hins vegar vilja menn ná lausn sem hægt er að heimfæra á niðurstöðu ráðgefandi þjóðaratkvæðagreiðslunnar.

Kemur til greina af hálfu þingflokks Samfylkingarinnar að taka út einstök ákvæði í þessu frumvarpi sem varða stjórnskipunina í samræmi við athugasemdir Feneyjarnefndarinnar? „Við ræddum ýmsa kosti á þingflokksfundi í gær. Við horfum til þess hversu áliðið er þings og hversu mikilvægt það er að það takist ekki að tala í kaf þann þjóðarvilja sem kom fram í tillögu stjórnlagaráðs og þjóðaratkvæðagreiðslunni í kjölfarið. Og finna farveg til þess að ferli stjórnarskrárumbóta geti haldið áfram," segir Árni Páll Árnason, formaður Samfylkingarinnar.

Hann segir að til greina komi að „áfangaskipta verkefninu," eins og hann orðar það. Þingflokkurinn hafi rætt ýmsa kosti í þeim efnum en það hafi ekki verið nein bein niðurstaða á fundinum.

Næsti þingfundur er á þriðjudag. Ásta Ragnheiður Jóhannesdóttir, forseti Alþingis, sagði óákveðið hvernig dagskráin yrði. Ekki liggur því fyrir hvenær önnur umræða um stjórnarskrármálið heldur áfram. Samkvæmt þingsköpum getur önnur umræða í raun haldið áfram fram í hið óendanlega. Þetta er það sem Árni Páll Árnason átti þegar hann sagði að þingmenn Samfylkingarinnar vildu fyrirbyggja að málið yrði talað í kaf.

Samkvæmt starfsáætlun þingsins eru aðeins tólf þingfundir eftir en hitt eru nefndafundir. Þingi verður frestað hinn 15. mars næstkomandi. Þingkosningar verða 27. apríl 2013. thorbjorn@stod2.is