Fagnar áliti sem segir verðtrygginguna ganga í berhögg við tilskipun ESB

Talsmaður neytenda fagnar áliti sérfræðings ESB sem telur lagaaákvæði um verðtryggingu í íslenskum lögum ganga í berhögg við tilskipun Evrópusambandsins um neytendalán. Hann hallast að því að tilskipunin, eins og hún hefur verið innleidd í íslensk lög eigi einnig við fasteignaveðlán en ekki eingöngu smærri lán. Brýnt sé að löggjafinn taki á málinu og láti neytendur njóta vafans.

Prófessor í Evrópurétti við HÍ sem vinnur að rannsókn um lögmæti verðtryggingar í vaxtalögum óskaði nýlega eftir áliti framkvæmdastjórnar ESB um hvort verðtryggingarákvæði í 13.gr. laga um vexti og verðtryggingu samrýmdust tilskipunum ESB.

Álit sérfræðings Framkvæmdastjórnar Evrópusambandsins er að lagaákvæði um verðtryggingu í íslenskum lögum gengur í berhögg við tilskipun Evrópusambandssins um neytendalán.

En þar með er ekki öll sagan sögð því Áslaug Árnadóttir lögmaður og sérfræðingur í Evrópurétti telur þessa tilskipun einungis eiga við í málum um smærri lán, til dæmis bílalán en ekki fasteignaveðlán. Á þessari stundu sé ekki til tilskipun sem taki til fasteignaveðlána í Evrópurétti.

Gísli Tryggvason talsmaður neytenda er hins vegar á öðru máli og segir álit sérfræðings ESB vera stórtíðindi fyrir neytendur.

„Ég er búin að halda því fram að verðtrygging eins og hún er framkvæmd á Íslandi, stangist á við Evrópurétt og þarna er komið álit sem staðfestir það."

Þetta sé engu að síður álitamál lögfræðinga.

„Ég hallast að því að húsnæðislán falli undir þetta álit vegna þess að Evrópurétturinn á að gilda framar og er nýlegri löggjöf heldur en sú sem verðtryggingin hvílir á."

Þannig að þú telur að þeir skuldarar sem nú eru að reyna að lögmæti verðtryggingarinnar hnekkt fyrir dómstólum geti stuðst við þessa tilskipun?

„Já ég tel að það sé hægt og hefði betur verið gert mun fyrr og sumir eru að gera það," svarar Gísli.

Hann telur brýnt að löggjafinn taki á þessu máli frekar en dómstólar.

„Mér finnst að löggjafinn eigi að taka á þessu núna, taka stöðu með neytendum og láta þá njóta

vafans," segir Gísli.