Stakk sér í sjóinn á stuttbuxunum

Hafsögubátur frá Reykjavíkurhöfn bjargaði karlmanni úr sjónum rétt utan við Snorrabraut í gærkvöldi, en samkvæmt upplýsingum frá lögreglu sáu sjónarvottar manninn koma hlaupandi yfir Sæbraut á stuttbuxum einum fata og hlaupa í átt til hafs.

Fjölmennt lið lögreglu var kallað á staðinn, auk kafarabíls frá slökkviliðinu, en maðurinn var þó nokkra stund í sjónum þar til honum var komið um borð í bátinn.

Maðurinn var fluttur á slysadeild til aðhlynningar, en talið er að honum hafi ekki orðið alvarlega meint af sundinu.