Snorri í Betel vill á þing

„Já, ég gekk í Kristilega flokkinn," segir Snorri Óskarsson, oft kenndur við Betel. „Við viljum bjóða okkur fram, gagngert til þess að kristnu gildi hafi hljómgrunn, eða talsmann, á Alþingi."

Það var Akureyri Vikublað sem greindi frá því í gær að Snorri hefði gengið til liðs við flokkinn, sem mun bjóða fram til bæði þings og borgarstjórnar. Á vefsíðu þeirra kemur fram að stjórnmálasamtökin vilji „bæta þar úr sárri vöntun á kristnum baráttuvegi, enda er ásókn veraldlegra hreyfinga mjög áberandi hér á síðustu árum og mörg vígi kristins siðferðis fallin, umfram allt þau sem varða líf ófæddra barna."

„Hin Kristnu gildi hafa verið á undanhaldi," segir Snorri. „Biblían er ekki mikið notuð sem bók leiðsagnar eða hjálpar. Tilfellið er að í gegnum söguna þá hafa kristin sjónarmið verið grunnur að þessari löggjöf okkar."

Snorri er umdeildur maður. Á dögunum var hann rekinn úr starfi sínu við Brekkuskóla og um árabil hafa skoðanir hans á samkynhneigð vakið hörð viðbrögð. Snorri óttast þó ekki þetta muni hafa neikvæð áhrif á framboð hans eða störf Kristilega flokksins.

„Ég átta mig alveg á því að sumir telji þetta ekki vera heppilegt. En þá er spurningin á móti: Vilja menn eingöngu fá skoðanalausa aðila á þing? Eigum við að vera viljalaus verkfæri? Staðreyndin er sú að það eru þrýstihópar í þjóðfélagi okkar. Eiga stjórnmálaflokkar að vera handbendi þessa þrýstihópa? Ég segi nei."

„Við viljum ekki setja einhvers konar sharia-lög hér á landi," segir Snorri og bætir við: „Við eigum að gæta þess að leggja grunnreglur samfélagsins og gæta þess að það sé eðlilegt réttlæti og samhengi hér á landi. Að einstaklingarnir okkar, sama hvort að maðurinn er ríkur eða fátækur, að þeir standi jafnfætis gagnvart réttindum."