Fundu veski og síma Grétars í fjörunni

Björgunarsveitar- og lögreglumenn fundu í morgun úlpu, húfu, veski og síma Grétars Guðfinnssonar í fjörunni norðan við Siglufjörð í morgun. Grétars hefur verið saknað frá því í gærmorgun og hefur leit staðið yfir síðan þá.

Samkvæmt upplýsingum frá lögreglunni á Akureyri taka hátt í hundrað manns í leitinni og er áhersla lögð á höfnina í bænum og fjöruna í kring. Kafarar frá Landhelgisgæslunni leita á þeim stöðum. Þá hafa björgunarsveitarmenn notað sporhunda í leitinni.

Ekki leikur grunur á að neitt saknæmt hafi átt sér stað. Leitin heldur áfram í dag og verður það svo ákveðið í kvöld hvernig henni verður háttað.

Grétar er 45 ára gamall, 185 sentímetrar á hæð, grannvaxinn og með ljóst stutt hár. Ef einhver telur sig geta aðstoðað lögregluna við leitina á honum, er bent á að hafa samband við lögregluna á Akureyri.