Börkur fluttur úr héraðsdómi með sjúkrabíl

Börkur Birgisson, sem ásamt Annþóri Kristjáni Karlssyni er ákærður fyrir sérstaklega hættulega líkamsárás á Litla-Hrauni sem leiddi til dauða Sigurðar Hólm Sigurðssonar, var fluttur úr Héraðsdómi Suðurlands með sjúkrabíl fyrir skömmu.

Þinghald var lokað þegar málið var þingfest klukkan 13:15 og dómari tilgreindi ekki ástæðu þess. Ekki er vitað hvaða afstöðu Börkur tók til sakarefnisins.

Verjandi Barkar segir hann vera með alvarlegt brjósklos og að ekki hafi verið tekið tillit til þess þegar hann var borinn í járnum úr lögreglubíl í dómsalinn. Dómari er sagður hafa ákveðið að kalla til sjúkrabíl.