Bjarni Ben: Ég er orðinn þreyttur á Samfylkingunni

Bjarni Benediktsson, formaður Sjálfstæðisflokksins, sagði á landsfundi flokksins síðdegis að hann væri orðinn þreyttur á Samfylkingunni þar sem flokkurinn tali niður íslensku krónuna og skilji hvorki né sér að Ísland eigi sóknarfæri í allar áttir.

„Þau [Samfylkingin] segja að Evrópusambandið sé orðið þreytt á EES samningnum. Ja, ég er orðinn þreyttur á Samfylkingunni og þeirra sífellda brölti við að grafa undan sjálfstæði þjóðarinnar, ég er orðinn þreyttur á að þau tali niður gjaldmiðilinn og skilja hvorki né sjá að Ísland á sóknarfæri í allar áttir. Við viljum ekkert í Evrópusambandið," sagði Bjarni.

„Evrópusambandið er sífellt að soga til sín völd á fleiri sviðum. Utanríkisráðherra Breta lýsir því þannig að fólki finnist í síauknum mæli sem Evrópusambandið sé ekki þarna í þágu þess, því líður frekar eins og Evrópusambandið sé eitthvað sem hafi komið fyrir það," sagði Bjarni.

Jafn margar konur og karlar í ríkisstjórn

Þá sagði hann að allt stefni í að fleiri konur verði kjörnar á þing fyrir Sjálfstæðisflokkinn í vor en nokkru sinni fyrr.

„Auk þess hefur Sjálfstæðisflokkurinn undanfarið mælst með jafnmikið fylgi meðal karla og kvenna. Þetta er mikið gleðiefni. [...] Það er valinn maður í hverju rúmi og að sjálfsögðu munum við gæta þess að hlutur karla og kvenna úr okkar röðum verði jafn þegar kemur að ríkisstjórnarmyndun."

Þurfum að taka til í ríkisfjármálum

Þá kom bjarni inn á íbúðalánamarkaðinn á Íslandi. „Það þarf að örva atvinnulífið, lækka skatta og vinda ofan af flækjustiginu. Við munum byrja á tryggingagjaldinu og halda svo áfram að greiða fyrir fjárfestingum í atvinnulífinu, og taka til í ríkisfjármálunum – hætta skuldasöfnun.

Fyrrverandi forsætisráðherra Finna var hér á landi fyrir nokkrum dögum á viðskiptaþingi. Hann sagði að það hefði hreinlega bjargað finnska velferðarkerfinu í kreppunni fyrir tuttugu árum að lækka og einfalda skatta á fyrirtækin og örva atvinnulífið. Þannig var fjárfesting aukin, tekjur ríkisins tóku kipp og hægt var að standa undir velferðinni.

Þetta eru lykilatriði ásamt aukinni skilvirkni í opinberri þjónustu og bættri peninga- og fjármálastefnu. Við þurfum aðgerðir til að minnka hagsveiflur og draga úr verðbólgu. Þannig hefjum við nýtt framfaraskei," sagði hann.