Zlatan er heitur fyrir Celtic

Zlatan Ibrahimovic hefur opnað dyrnar á það að ganga til liðs við skosku meistarana í Celtic en hann er mikill aðdáandi stemningunnar á Celtic Park, heimavelli Celtic.

Zlatan hefur leikið með nokkrum af stærstu félögum heims en áður en hann gekk til liðs við PSG lék hann með liðum á borð við Juventus, Barcelona, Inter og AC Milan. Hann segir Celtic vera draumalið til að enda ferilinn hjá.

„Celtic er félag með mikla hefð og er staður þar sem allir toppleikmenn myndu vilja enda ferilinn á,“ sagði Zlatan Ibrahimovic við skosku útgáfu The Sun.

„Hvernig gæti ég sagt að ég myndi ekki vilja leika fyrir framan þessa stuðningsmenn í hverri viku?“

Fyrrum félagi Zlatan í framlínu sænska landsliðinsins, Henrik Larsson gerði garðinn frægan hjá Celtic og skoraði meira en 200 mörk fyrir skoska stórliðið.

„Henrik var nógu góður til að leika fyrir hvaða félag sem er í Evrópu en eftir að hafa leikið á Celtic Park skilur maður af hverju hann lék þar svo lengi. Enginn leikmaður vill fara af þessum leikvelli og frá þessum stuðningsmönnum.

„Ég hef tekið þátt í stærstu leikjum fótboltans en aldrei upplifað stemningu eins og á Celtic Park,“ sagði Zlatan.

Blaðamaður skoska The Sun hermdi ummæli Zlatan upp á Neil Lennon knattspyrnustjóra Celtic sem svaraði léttur að skoskum sið. „Hann þyrfti að leika vel til að komast í liðið,“ sagði Lennon.

„Þetta er gott hrós fyrir félagið og sýnir það orðspor sem við höfum byggt upp hér.

„Þetta er eins af þessum sögum, ég veit ekki hvort hún sé sönn en það væri frábært að fá svona leikmann til liðsins en ég held að sé langt í það þó.“