Treysta ekki lögreglunni eftir hrottalega nauðgun

Hundruð kvenna í Delhi hafa síðastliðna daga sótt um byssuleyfi. Ástæðan er mikil umfjöllun um hrottalega nauðgun, þar sem sex karlmenn nauðguðu 23 ára gamalli konu og limlestu hana í síðasta mánuði. Breska blaðið Guardian segir að fréttirnar af þessum aukna byssuáhuga sýni hversu óöruggt fólk sé í þessari borg. Skortur á trausti gagnvart lögreglunni sé alger.

Konan sem ráðist var á í Delhi lést af sárum sínum á föstudag eftir að hafa legið á spítala í þrettán daga á Indlandi og í Singapúr. Ösku hennar var dreift yfir á í norðurhluta Indlands í dag.

Mál konunnar hefur vakið mikla reiði á Indlandi undanfarna daga og hafa tugþúsundir manna mótmælt og krefjast harðari hegningarbrotalaga og betri gæslu.