Vopnahléið í Sýrlandi heldur enn

Vopnahléið í Sýrlandi heldur enn, þrátt fyrir áframhaldandi átök stjórnarhermanna og andspyrnumanna. Að minnsta kosti fimm létust í dag þegar öryggissveitir skutu á hóp mótmælenda.

Hersveitirnar hafa þó víðast hvar dregið sig í hlé og hið sama má segja um stjórnarandstæðinga.

Bashar al-Assad, forseti Sýrlands, fyrirskipaði hersveitum sínum í gær að hætta loftárásum á vígi andspyrnumanna.

Þar með hófst vopnahléið en stjórnarhermenn eru þó enn sýnilegir í nær öllum borgum landsins.

Vopnahléið er fyrsti liður í friðaráætlun Kofi Annans, erindreka Sameinuðu Þjóðanna og Arabandalagsins. Annan vonast til þess að þrjátíu eftirlitsmenn á vegum Sameinuðu Þjóðanna fái inngöngu í landið á næstu dögum og eiga þeir að fylgjast með ástandinu í landinu.

Yfirvöld í Sýrlandi hafa heitið því að viðhalda vopnahléinu en leiðtogar heimsveldanna draga þó loforð þeirra í efa.