Fá ekki skýrslu frá Hagfræðistofnun

Alþingi ætlar ekki að biðja Hagfræðistofnun Háskóla Íslands að svo stöddu um að vinna úttekt á áætluðum kostnaði við gerð Vaðlaheiðaganga. Ásta Ragnheiður Jóhannesdóttir tilkynnti Guðfríði Lilju Grétarsdóttir, formanni umhverfis- og samgöngunefndar, þetta með bréfi í dag. Nefndin óskaði í nóvember eftir því að úttektin yrði unnin.

Ástæða þess að Hagfræðistofnun verður ekki beðin um að vinna úttektina að sinni er sú að fyrir liggja tvær skýrslur um málið, annars vegar skýrsla sem IFS greining vann fyrir fjármálaráðuneytið og hins vegar skýrsla sem Pálmi Kristinsson verkfræðingur vann. Forsætisnefnd telur að á meðan umhverfis- og samgöngunefnd hefur þessar skýrslur til umræðu sé ekki tilefni til að afgreiða beiðni nefndarinnar.

Þá bendir forsætisnefnd á að Hagfræðistofnun hafi á sínum tíma unnið skýrslu um málið, eins og greint var frá í fjölmiðlum í síðustu viku. Kristján Möller, þáverandi samgönguráðherra, hefur verið sakaður um að stinga þeirri skýrslu undir stól.