Skordýrafræðingur: Kakkalakkar mjög skemmtileg gæludýr

„Þetta eru mjög skemmtileg dýr, þarna er mikil fjölbreytni og sumir geysistórir og fallegir líka, þó svo mörgum bjóði við þeim," sagði skordýrafræðingurinn Erling Ólafsson, í viðtali í Reykjavík síðdegis á Bylgjunni í dag, þar sem hann var spurður út í þá sérkennilegu nýlundu að dýrabúð í Kópavogi bjóði nú almenningi að kaupa meðal annars kakkalakka sem gæludýr.

Það var meðal annars DV sem greindi frá því að Ingólfur Tjörvi Einarsson, eigandi verslunarinnar Furðufugla og fylgifiska, byði nú Íslendingum að kaupa þúsundfætlur frá Afríku, kakkalakka, eins og fyrr greinir frá sem og engisprettur, sem þótti reyndar glæsilegt gæludýr á meðal hefðarfólks í Kína á öldum áður.

Erling slær á allar áhyggjur um að skordýrin gætu gert einhvern óskunda slyppu þau út í íslenska náttúru. Kvikindin þurfa mikinn hita til þess að fjölga sér. „Þannig þurfa þessir kakkalakkar minnsta kosti 25 gráðu hita til þess að fjölga sér," útskýrir Erling í viðtalinu.

Hægt er að hlusta á stórskemmtilegt viðtal við Erling í Reykjavík síðdegis hér.