Kötturinn Meow: Feitur en fallegur

Starfsmönnum í dýraathvarfi í Santa Fe í Bandaríkjunum brá heldur í brún þegar kötturinn Meow var færður undir þeirra umsjá í síðustu viku.

Meow er aðeins tveggja ára gamall og er nú þegar tæp 20 kíló að þyngd.

Síðustu ár hefur Meow haft afdrep hjá 87 ára gamalli konu í Nýju-Mexíkó. Þyngd kattarins gerði það að verkum að gamla konan þurfti að leita á náðir dýraathvarfsins. Hún sagðist ekki hafa burði til að annast dýrið lengur.

Starfsmenn dýraathvarfsins hafa nú sett Meow í strangan megrunarkúr.

„Það fer ekki milli mála að Meow þjáist af offitu," sagði Ben Swan, forstöðumaður dýraathvarfsins, í samtali við AP fréttaveituna. „Þó er hann fallegur og afar snoppufríður. En hann er sannarlega feitur."

Um sinn verður Meow í fóstri hjá fjölskyldu í Santa Fe. Fylgst verður náið með mataræði hans og er vonast til að hann eigi eftir að léttast um 4.5 kíló á næstu vikum.

Að átakinu loknu verður Meow vonandi ættleiddur.

Ekki er vitað hvernig Meow gat þyngst svo mikið á aðeins tveimur árum. Fullorðnir kettir eru vanalega 3.2 til 5.5 kíló að þyngd.