Náði David Beckham að breyta Bandaríkjunum?

David Beckham fór til Bandaríkjanna með það markmið að gera knattspyrnu vinsæla í landinu. Það hafa fleiri reynt og meðal annars Pelé. Beckham eyddi sex árum í landinu og hafði talsverð áhrif á uppgang mála.

Sex ára dvöl Davids Beckham í Bandaríkjunum er lokið. Beckham kom til fyrirheitna landsins með háleitar hugmyndir og til mikils var ætlast af honum. Hann er maðurinn sem átti að rífa knattspyrnuna upp í vinsældum í landinu og setja hana á stall með amerískum fótbolta, hafnabolta, körfubolta og íshokkí.

Þetta var ekki lítið markmið enda hafði sjálfum Pelé ekki einu sinni tekist að gera knattspyrnuna vinsæla er hann lék með NY Cosmos árið 1975.

Forráðamenn LA Galaxy lögðu mikið undir og greiddu Beckham 20 milljónir punda fyrir fimm ára samning. Hann varð þar með langlaunahæsti leikmaður deildarinnar.

„Knattspyrna er vinsælasta íþróttin í öllum löndum nema Bandaríkjunum. Þess vegna vil ég vera hérna og hafa áhrif á krakkana," sagði Beckham er hann kom til landsins. Gríðarlegt fjölmiðlafár var er þau hjónin komu til landsins og engu líkara en kóngafólk hefði lent í Los Angeles.

„Það er óhætt að segja að enginn íþróttamaður hafi fengið álíka móttökur og David Beckham," skrifaði blaðamaður AP við það tilefni.

Það skemmdi ekki fyrir að stjörnurnar í Hollywood voru duglegar að láta sjá sig á vellinum hjá Galaxy. Í fyrsta leik Beckhams voru í stúkunni Tom Cruise, Katie Holmes, Eva Longoria, Jennifer Love Hewitt og sjálfur Arnold Schwarzenegger.

Aftur á móti varð lítið úr fyrsta tímabili Beckhams hjá Galaxy því hann spilaði aðeins fimm leiki vegna meiðsla. Botninn datt svolítið úr markaðsherferðinni í kjölfarið og ekki tókst nægjanlega að nýta meðbyrinn sem fylgdi Beckham. Þess utan gekk illa hjá Galaxy fyrstu tvö árin og liðið komst ekki í úrslitakeppnina.

Það var svo ekki að vinna með Beckham að hann ákvað að koma seint til móts við Galaxy árið 2009. Þá var hann í láni hjá AC Milan á Ítalíu. Liðsfélagi hans, Landon Donovan, gagnrýndi þá Beckham opinberlega og efaðist um hversu mikinn metnað Beckham hefði í raun og veru fyrir félaginu.

Þó svo Bandaríkjamenn væru almennt ekki að fylgjast með Beckham á fótboltavellinum fóru David og eiginkona hans, Victoria, ekki fram hjá neinum enda voru þau dugleg að láta sjá sig á hinum og þessum viðburðum og voru fastagestir í slúðurblöðunum. Vinskapur Beckham-hjónanna við þáverandi hjónin Tom Cruise og Katie Holmes var sérstaklega eftirsótt umfjöllunarefni.

Svo var David á auglýsingaspjöldum um öll Bandaríkin að auglýsa nærbuxur og er óhætt að segja að fáar auglýsingar hafi vakið eins mikla athygli.

„Ég held að þau hafi ekki breytt ímynd Breta í Bandaríkjunum á sama hátt og Kate Middleton hefur gert. Þau komu þó vel fyrir. Beckham-fjölskyldan virðist vera hamingjusöm og er falleg. Það líkar Bandaríkjamönnum," sagði blaðamaður The Times í Bandaríkjunum.

Á þeim tíma sem Beckham-hjónin komu til Bandaríkjanna lifði Victoria á fornri frægð sem fyrrverandi meðlimur í stúlknasveitinni Spice Girls. Hún vildi þó hasla sér völl í tískuheiminum og hefur gengið betur en fólk þorði að vona. Fatalínur hennar hafa mokselst og hún er nú loksins að verða þekktari sem tískuhönnuður en söngkona.

Á sama tíma og ferill Victoriu fór á flug fór loksins að ganga betur á vellinum hjá David. Fyrrverandi landsliðsþjálfari Bandaríkjanna, Bruce Arena, tók við liðinu og eftir það varð það eitt það besta í Bandaríkjunum.

Síðustu tvö ár hefur Galaxy unnið bandaríska meistaratitilinn og það var staðið upp og klappað fyrir Beckham í lokaleik hans með félaginu. Hann gekk út sem sigurvegari þar líkt og hann gerði í Englandi og á Spáni á sínum tíma.

Þó svo að fleiri Bandaríkjamenn séu farnir að gefa knattspyrnunni séns í dag hefur ekki orðið nein brjálæðisleg aukning í áhorfi á leiki MLS-deildarinnar. Þegar Beckham kom í deildina var áhorfendameðaltalið 15.500 manns. Í dag mæta að meðaltali 18.800 á leik í deildinni. Aftur á móti hefur liðum deildarinnar fjölgað úr 13 í 19.

Beckham náði því ekki aðalmarkmiði sínu að gera knattspyrnu að alvöru íþrótt í Bandaríkjunum en hann skilaði samt mörgu góðu og hjálpaði deildinni að festa sig almennilega í sessi. Hann getur því gengið út hnarreistur með tvær sigurmedalíur í farteskinu.