Xi Jinping nýr leiðtogi í stað Hu Jintao

Hu Jintao, forseti Kína, lét í gær af embætti leiðtoga Kommúnistaflokksins í Kína. Reiknað var með að hann segði sig úr fleiri embættum, þar á meðal sem yfirmaður herráðsins.

Hu myndi þar með ganga lengra en forverar hans, því til þessa hefur verið látið duga að eftirmenn þeirra taki smám saman við embættunum.

Xi Jinping, arftaki Hus, fær þar með skýrara umboð strax frá upphafi og meiri möguleika til þess að styrkja stöðu sína.

„Þetta yrði mikilvægt fyrir pólitíska arfleifð Hus, og hann rýfur þá vondu hefð að fráfarandi ráðamenn haldi í völdin,“ segir Zhang Lifan, óháður fræðimaður í Peking. Þetta er reyndar aðeins í annað skipti sem valdaskipti ganga snurðulaust fyrir sig í Kína frá því Kommúnistaflokkurinn komst til valda þar fyrir rúmlega 60 árum.

Að þessu sinni eru það Hu og félagar, sem flestir eru um sjötugt eða á ofanverðum sextugsaldri, sem víkja fyrir næstu kynslóð ráðamanna, sem flestir eru um það bil áratug yngri. Ekki er búist við neinum viðsnúningi í stefnu flokksins, enda hefur yngri kynslóðin árum saman verið valdamikil innan flokksins.

Valdaskiptin fara að venju fram á vettvangi landsþings Kommúnistaflokksins, sem haldið er á fimm ára fresti. - gb