Fólk leitaði skjóls á sjúkrahúsi

Tugir manna fórust þegar jarðskjálfti reið yfir í Gvatemala í fyrrinótt. Skjálftinn mældist 7,4 stig og olli miklu tjóni, einkum í borginni San Marcos en einnig í mismiklum mæli um allt landið.

Skjálftinn fannst á mjög stóru svæði, meðal annars í Mexíkóborg sem er í 965 kílómetra fjarlægð frá upptökum skjálftans.

Í San Marcos hrundu tugir íbúðarhúsa og margar af litríkum byggingum miðbæjarins voru ýmist með stórum sprungum eða algerlega í rústum, þar á meðal bæði lögreglustöð borgarinnar og dómshúsið.

Íbúar borgarinnar óttuðust stóra eftirskjálfta og margir leituðu skjóls í sjúkrahúsinu, sem var eina húsið sem rafmagn var enn í.

Björgunarstörf hófust strax um nóttina og þegar birta tók af degi var stórvirkum vinnutækjum beitt við að leita að fólki, sem enn kunni að leynast á lífi í rústunum.

Í gærmorgun lá öll starfsemi fyrirtækja og stofnana niðri í borginni, enda rafmagnslaust alls staðar og starfsfólk að huga að tjóni.- gb